DUAW
(samtang giduyugan ko ug white noise)
Kung naka-yarok kuno ka
ug sobra’s duha ka tasa’s kapi
sulod sa usa ka adlaw,
trayduron ka sa imong utok:
ang suga mosayaw,
ang silaw modala’g lamat,
aron ikaw – nga nipugos pag-tukaw
aron magsuwat, magbasa, magtabi –
dagiton sa kasubo nga lanog
og kalipay nga alingugngog.
Sa di mag-dugay,
lumsan ka sa hinyap nga lawom.
Ug bantayi, kung aduna’y
mohapyod sa imong tangkugo,
pugngi ang pag-lingi,
kay kung dili
mag yapayapa ka’s kakuyaw.
Kay sa anang higayona,
nag-lurat ang mga pilosopong
dugay mo nang gipakatulog
sa imong utok.
Kabliton ka
sa amahan sa amahan
sa imong amahan –
o bisan kinsang anhing
(ma-mestiso, ma-langyaw, ma-nitibo)—
aron dasigon ka sa paglantugi.
Matod sa akong higala nga utro sa’ng hingapi,
dili kuno nimo angay dili-an ang maong pagdapit,
kay mosamot ang kasikas sa imong kusina
og gani, basin damagon ka
hantod sa lungon:
pastilan kahadlok!
Kay gibangon mo na man gyud
ang mga karaan, abi-abiha
(tudlo-ig FB, kantahi’g rock n’ roll, basahi’g balak)
Apan, hinumdumi nga ilang pagbutho
dili lamang alang sa imong bahin:
pamasin nga aduna sila’y buot
tuki-on: kahiladman,
kasayuran, katim-awan.
Ug samtang mo lubaylubay na ang kape,
atangi ilang sugyot,
ug kupti ug hugot,
aron kini dili mataligam-an
sa imong pagkapaw
gikan sa nirvana.
